Ҷамоати деҳоти Барвози ноҳияи Роштқалъа бо тимҳои муваффақи волейбол ва баскетбол дар вилояту кишвар  машҳур аст. Ин муваффақият дар натиҷаи машқи доимии хонандагони мактаб ва ҷавонони ҷамоат ба даст омадааст.

Сокинони деҳаи Бидизи Болои ин ҷамоат тасмим гирифтанд, ки мавзеи пур аз харсангро тоза карда,  майдончаи варзишӣ бунёд намоянд.

Ин мавзеъ бо қувваи сокинони деҳа аллакай тахту ҳамвор шуда, сохтмони варзишгоҳ бо маром идома дорад. Вазорати энергетика ва захираҳои оби кишвар барои сохтмони варзишгоҳ ба маблағи 36 ҳазор сомонӣ масолеҳи сохтмонӣ кумак карда, ҳамчунин, аз тарафи муҳоҷирони меҳнатӣ ва сокинони деҳа 54 ҳазор сомонӣ маблағ ҷамъоварӣ шудааст. Варзишгоҳ туҳфаи хубест ба ҷашни 30-юмин солгарди Истиқлолияти давлатии Ҷумҳурии Тоҷикистон.