Дар нишасти матбуотии  филиали Донишгоҳи миллии таҳқиқотии технологии «МИСИС» дар шаҳри Душанбе директори он Муминҷон Ҷӯраев оид ба фаъолияти он дар тӯли 6 моҳ маълумот дода, аз ҷумла, зикр намуд, ки соли ҷорӣ филиалро 197 нафар бомуваффақият хатм карданд.

Маросими супурдани дипломҳои хатмкардагон бо иштироки муовини аввали вазири маориф ва илми ҷумҳурӣ Р.Мирбобоев, муовини ректори филиали донишгоҳи мазкур В.Хван, сафири фавқулода ва мухтори Федератсияи Россия дар Тоҷикистон И.С.Фролов - Лякин баргузор гардид. Қайд шуд, ки тайи солҳои охир дар филиал нақшаи комплексии пешбурди корҳои илмӣ – таҳқиқотӣ таҳия гардид, ки рафти иҷрои он таҳти назорат қарор дорад. Омӯзгорону устодони филиал солҳои охир 6 китоби дарсӣ ва васоиту дастури таълимӣ, 230 мақолаи илмӣ дар маҷаллаҳои Тоҷикистон ва 30 мақола дар маҷаллаҳои илмии хориҷи кишвар таҳия ва чоп намуданд. Ҳамзамон, ҷиҳати пешбурди ҳадафмандонаи корҳои илмӣ – таҳқиқотӣ филиал бо Институти илмӣ – таҳқиқотии ширкати «Алюминии тоҷик» шартномаи ҳамкорӣ ба тасвиб расондааст. Бояд гуфт, ки ҷараёни таълим дар асоси стандартҳои таълимии федералии фанҳои забони тоҷикӣ ва таърихи тоҷик ворид гардидааст.

Ҳамасола донишҷӯёни филиал дар олимпиадаҳои ҷумҳуриявӣ ширкат меварзанд. Дар конфронсҳои илмии ҷумҳурӣ ва хориҷи кишвар омӯзгорони филиал 138 маротиба ширкат намуданд.

Ш.Раҷабзод,

«Омӯзгор»