Ҳангоми омӯзиши фанни математика тафаккури хонандагон инкишоф меёбад, онҳо истифодаи аломату ишораҳо, тарзи фикрронӣ ва хулосабарории мантиқиро аз худ мекунанд.

Умуман,  тафаккури  математикӣ тафаккури  мантиқии   махсус   буда,  сифатҳои  ақлии  шогирдонро   инкишоф  медиҳад.  Мақсади  асосии   таҳсил  баланд  бардоштани  маҳорат  ва  истеъдоди  хонанда   мебошад.   Ҳар як  муаллим  бояд   эҷодкор  ва   навовар  бошад. Барои  ин  муаллимро  мебояд   истеъдоду   маҳорати  худро   васеъ   истифода  бурда,  шавқу  ҳаваси  хонандаро  нисбат  ба  фанни  математика  афзун  намояд.   Ин,  албатта,  меҳнати  зиёдеро  талаб    мекунад  аз  ҷумла:  тайёр  кардани  карточкаҳо,  сохтани аёниятҳо, корҳои  санҷишии бисёрварианта, бозиҳои  шавқовар ва  ҷустуҷӯи  усули нави  таълим.

1)  Дар  синфи  5-8  баъд  аз шиносоӣ  бо  хонандагон  ва   санҷидани  сатҳи  дониши    ҳар  як  хонанда,  синфро  ба   се  гурӯҳ  ҷудо  менамоям: 

А)   хонандагони  эҷодкору  қобилиятнок

Б)    хонандагоне,  ки  қобилияти  зиёд  надоранд, аммо  барои  омӯхтани  ин  фан  кӯшишу  ғайрат  нишон  медиҳанд:

В)   хонандагоне,  ки  на  қобилият  доранду  на  кӯшишу  ғайрат  мекунанд.

2)  Аз  бозиҳои  математикӣ  истифода мекунам  масалан:  дар  тахтаи  синф   пешакӣ  дар  ду  сутун  15-то  мисоли  ҷамъу  тарҳи  ададҳои  бутун  навишта  шудааст.  Дар  ин бозӣ  аз  ҳар  як  қатор  5-нафарӣ   иштирок  мекунанд.  Ғолиби  ин   бозӣ  ҳамон  қаторе   мешавад,   ки  мисолҳоро  пеш  аз  дигар  қаторҳо  ва бехато  ҳал  карда  бошад.

3)  Методи  интерактивӣ:  синфро  ба  якчанд  гурӯҳ ҷудо карда, ба ҳар як гурӯҳ  як  масъала дода мешавад.  Баъди якчанд  вақт намояндагони  гурӯҳҳо  тарзи  ҳали  масъаларо  баён мекунанд.  Гурӯҳҳо метавонанд якдигарро пурра  намоянд.

4) Истифодаи консултантҳо (машваратгарон): Хонандагони  пешқадам  ҳамчун  консултант  истифода  бурда  мешаванд.  Ба ҳар як  консултант   3-4  хонандаи сустхон вобаста  мегардад.   Вазифаи  консултант аз  он  иборат  аст,  ки  оид ба   мавзӯъҳои  гузашта   ба  хонандагони  сустхон  мухтасар фаҳмонда диҳад.

5)  Санҷишҳои  тестӣ:   ба  ҳар  хонанда  саволҳои   тестии   алоҳида  дода  мешавад,  ки  ин   вақти  бисёрро  талаб   намекунад  ва  диққати  хонандагонро  барои  ҳалли  мисолу масъалаҳои  шавқовар   ба  худ  ҷалб  мекунад.

6) Ҳавасмандкунии   хонандагон:  барои  ҳавасмандкунии  хонандагон  метавонем   китобчаҳо  ва  албомҳои  навро  истифода  барем.

7) Лаҳзаҳои  фаҳмондадиҳӣ:  муаллим-  омӯзгор  дар  бораи  ҳалли   муодилаҳои  содда  ва   мураккаб   ба  хонандагон  як  қадар   вақти   муайяншударо  ҷудо  намуда,  онҳоро   мефаҳмонад.

Дар заминаи дарсҳои ҷолибу шавқовари омӯзгори тозакор ва ҷӯянда   хонанда  нисбат   ба   фанни  математика  шавқу   ҳаваси зиёд пайдо мекунад.

Гулинор ҲАКИМОВА,

омӯзгори мактаби №29-и ноҳияи Рашт