Мо дар Ватани Наврӯз,

Мо дар чамани Наврӯз.

Наврӯз гулафшон аст

Дар анҷумани Наврӯз.

Олам ҳама дар зоиш,

Одам ҳама дар ҷунбиш,

Ҷон дар тани осоиш

Аз омадани Наврӯз.

Ҳар ханда фараҳ резад,

Аз тоби нигаҳ резад,

Аз ҷому қадаҳ резад

Дар пираҳани Наврӯз.

Ҷамшед садо дорад,

Хуршед сафо дорад.

Оина ҷило дорад

Дар ҷону тани Наврӯз

Дар ойина борон зад,

Борони баҳорон зад,

Бӯйи гулу райҳон зад

Чун дар бадани Наврӯз.

Айни гулу гулҷӯш аст,

Наврӯз чаканпӯш аст,

Оғӯш ба оғӯш аст

Андар чакани Наврӯз.

Ҷӯрабек МУЪМИН,

ноҳияи Файзобод