15 июн зимни сафари корӣ дар ноҳияи Вахш Асосгузори сулҳу ваҳдати миллӣ - Пешвои миллат, Президенти Ҷумҳу-рии Тоҷикистон, муҳтарам Эмомалӣ Раҳмон дар деҳоти “20 - солагии Истиқлоли Тоҷикистон” ба бунёди ду муассисаи нави таълимӣ - мактаби таҳсилоти умумӣ ва мактаб-интернати кӯдакони ятим ва бепарастори ба номи Мирзо Сатторов санги асос гузоштанд.

Зимни муаррифии лоиҳаи бинои нави таълимӣ иттилоъ дода шуд, ки мактаб бо риояи талаботи замони муосир бунёд мегардад ва аз як ошёна, аз ҷумла утоқҳои фаннию лабораторӣ, китобхона ва дигар иншооти ёрирасон иборат буда, барои 480 нафар хонанда дар ду баст пешбинӣ гардидааст.

Ба иттилои масъулон, баъди ба истифода додани бинои нави таълимӣ мушкилоти набудани мактаб ва ё дур будани он аз назди хонаҳои шаҳрвандон ба пуррагӣ ҳал гардида, ба ин васила сатҳу сифати таълиму тарбия низ хубтару беҳтар хоҳад гардид.  

Зимни муаррифии бинои мактаб-интернати кӯдакони ятим ва бепарасторон ба Сарвари давлат иттилоъ дода шуд, ки мактаб-интернат бо дарназартошти талаботи ҷаҳонӣ бунёд шуда, дорои як хобгоҳ барои 480 нафар, маркази саломатӣ бо 6 ҳуҷра, ошхона барои 480 кас ва меҳмонхона барои пайвандону наздикони хонандагон мебошад.

Президенти мамлакат, муҳтарам Эмомалӣ Раҳмон ба сохтмончиёну масъулин дастур доданд, ки ҷараёни корҳои сохтмониро ҷиддӣ назорат карда, корҳои бунёдӣ бо сифат ва бо риояи талаботи меъморӣ бунёд гардад.

Иншооти мазкур аз ҷониби Ташкилоти ҷамъиятии байналмилалии хайриявии “Эҳёи Сомониён” бунёд гардида, то соли 2023 ба истифода дода хоҳад шуд. Иқдоми сохтмони мактаби таълимӣ ва мактаб - интернати бепарасторон дар деҳоти ноҳияи Вахш бо мақсади беҳтар намудани инфрасохтори соҳаи маориф ва фароҳам овардани шароити хуби таълим роҳандозӣ гардидааст. Ҳамин аст, ки дар ноҳия давоми се соли охир якчанд мактабу синфхонаи иловагӣ сохта ба истифода дода шуд, ки ба ин васила шароиту имконоти таълим низ беҳтару хубтар гардид.