Александри Македонӣ миёни ҷанговарони худ мардеро бо номи Александр медонист ва боз мушоҳида кард, ки ҳангоми  набард ҳамноми ӯ ҳамеша фирор мекунад. Як рӯзи фориғ аз набард Александри Македонӣ ҳамномашро диду гуфт:

- Хоҳиш мекунам ё нотарс бош ё номатро дигар бикун, ки ин монандии номҳои мо миёни лашкариён андешаҳои мухталифро тавлид месозад.

                                                                                   ***                      

Ривоят мекунанд, ки Александри Македонӣ худ марди ниҳоят ҷасур будааст ва ҷасоратро эътироф мекардааст. Боре як роҳзани баҳрӣ асири дасти ӯ шудааст. - Бигӯ, кӣ ба ту ҳуқуқ додааст, ки дар баҳр ҳукм меронӣ? - пурсидааст Александри Македонӣ.

- Ҳамон касе, ки ба ту ҳуқуқи ҳукмрониро дар соҳил додааст, - натарсида посух додааст роҳзан. Шигифтовар аст, ки ман он чӣ, ки бо киштии кучакам мекунам, роҳзаниаш меноманд, вале ту ба лашкари азиме ба ҳамин кор машғулию  туро хоҷа меноманд.

Пас аз чунин посух роҳзан ҷон ба саломат бурдааст.   

 Таҳияи Ҳотами ҲОМИД,

«Омӯзгор»