Раиси вилояти Хатлон Гулмаҳмадзода Давлатшо Қурбоналӣ зимни нишасти матбуотӣ бештар ба масоили марбут ба соҳаи маориф, фарогирии хонандагон дар истироҳатгоҳҳои тобистона, таъмиру тармими муассисаҳои таълимӣ ва амсоли инҳо диққати ҷиддӣ дод.

Аз ҷумла, қайд карда шуд, ки  дар муассисаҳои таълимии шаҳру ноҳияҳои вилоят теъдоди толибилмон ба 26 ҳазору 194 нафар расидааст ва лозим меояд, ки барои таҳсили мунтазами хонандагон ҳар сол дар ҳудуди вилоят 53 муассисаи таълимӣ сохта ба истифода дода шавад. Раиси вилоят қайд намуд, ки вазъи корҳо дар муассисаҳои таълимии шаҳру ноҳияҳои вилоят нисбат ба солҳои қаблӣ хубтар ба роҳ монда шудааст. Дар соли хониши 2017-2018  хонандагони муассисаҳои таълимии вилоят  дар озмунҳои ҷумҳуриявӣ ширкати фаъолона намуда, соҳиби 186 ҷойи ифтихорӣ, аз ҷумла,   сазовори  36 медали тилло, 56  медали нуҳра ва  86 медали биринҷӣ  гардиданд. Номбурда оид ба истироҳати тобистонаи кӯдакону наврасон низ ибрози ақида намуд. Айни ҳол, кӯдакону наврасон дар назди муассисаҳои таълимӣ дар лагерҳои фароғатӣ-истироҳатӣ ва лагерҳои беруназшаҳрӣ ба истироҳату фароғат фаро гирифта шуда бошанд ҳам, ин маънои онро надорад, ки масъалаи истироҳати онҳо пурра ҳалли худро ёфтааст. Имрӯз дар самти истироҳату фароғати мактаббачагон сари вақт ҷудо нагардидани маблағ, набудани шароити истироҳат камбудию мушкилоти зиёде ҷой доранд. Аз ин рӯ, мақомоти иҷроияи ҳокимияти давлатии вилояти Хатлон тибқи нақшаи чорабиниҳои вилоят бахшида ба ҷашни 30 – солагии Истиқлолияти давлатии Ҷумҳурии Тоҷикистон тасмим гирифтааст, ки дар ҷойҳои хушманзараи Чилдухтарон, Сарихосор, Ховалинг ва Муъминобод сохтмони лагерҳои истироҳатӣ-фароғатиро ба роҳ монад.

Шариф АБДУЛҲАМИД,

«Омӯзгор»