28-уми июли соли ҷорӣ Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон дар деҳаи Зерободи деҳоти Дар-Дари ноҳияи Айнӣ бинои нави муассисаи таҳсилоти миёнаи умумии рақами 15-ро мавриди баҳрабардорӣ қарор доданд.

Бинои нави муассисаи таҳсилоти миёнаи умумии рақами 15 дар ноҳияи Айнӣ дар асоси дастуру ҳидоятҳои Сарвари давлат, муҳтарам Эмомалӣ Раҳмон ҷиҳати муҳайёсозии шароити беҳтари таълиму тарбия барои насли наврасу ҷавон бо ҷалби маблағҳои буҷетӣ ҷавобгў ба талаботи муосир сохта шудааст.

Иншооти хуштарҳу муосири таълимӣ аз таҳхона ва се ошёна иборат буда, барои 640 нафар хонанда дар ду баст  пешбинӣ гардидааст.

Мактаб аз 28 синфхонаи барҳаво, аз ҷумла, синфхонаҳои фаннии химия, физика, математика, китобхона, ҳуҷраҳои корӣ барои омўзгорону кормандон, инчунин, ҳуҷраҳои ёрирасон иборат мебошад.

 Китобхонаи муассиса, ки бо мақсади ҷалби наврасону ҷавонон ба мутолиаи китоб таъсис ёфтааст, дорои 10 ҳазор нусха адабиёти гуногуни бадеию фаннӣ мебошад. Ҳамзамон, барои хонандагон утоқи алоҳидаи мутолиа бо шароити муосир ташкил гардидааст.

Сохтмони бинои муассисаи таълимӣ соли 2016 оғоз ёфта, корҳои бунёдӣ ва паймонкорӣ бо ҷалби зиёда аз 100 нафар мутахассиси Ҷамъияти дорои масъулияти маҳдуди “Тоҷикэлитсохтмон” бо сифати баланди меъморӣ ва дар асоси меъёрҳои мавҷуда ба анҷом расонида шудааст.

Президенти мамлакат, муҳтарам Эмомалӣ Раҳмон зимни шиносоӣ бо шароити муҳайёгардида дар бинои нави таълимӣ ба сатҳу сифати корҳои сохтмонӣ баҳои баланд дода, хонандагонро бо истифода аз имконоти мавҷуда ба омўзиши хуби барномаҳои таълимӣ, хусусан, фанҳои дақиқ, кор бо техникаю технологияи муосир ва омўзиши забонҳои хориҷӣ дар доираи ҳадафи “Бистсолаи омўзиш ва рушди фанҳои табиатшиносӣ, дақиқ ва риёзӣ дар соҳаи илму маориф, солҳои 2020-2040” ҳидоят намуданд.

Омўзгорону хонандагон бунёди бинои нави муассисаи таълимиро аз ғамхориҳои рўзафзуни Сарвари маорифпарвари мамлакат дар соҳаи илму маориф ва таълиму тарбияи насли ояндасози миллат арзёбӣ намуданд.

 Дар мактаб зиёда аз 50 омўзгори соҳибкасбу соҳибтаҷриба ба насли наврасу ҷавон дониш меомўзанд.

Ифтитоҳи бинои зебою замонавии мактаб бо шароити беҳтарини таълиму тарбия боиси хушнудӣ ва сипосгузории кулли мардуми деҳаи Зеробод гардид, зеро мактаби қаблии деҳаи мазкур ҳанўз соли 1971 сохта шуда, ба талаботи имрўза ҷавобгу набуд. 

Акнун бо мавриди баҳрабардорӣ қарор гирифтани бинои муосири таълимӣ барои фарзандони сокинони деҳаи Зерободи ноҳияи Айнӣ муосиртарин имкони таълиму тарбия фароҳам омад.

Дар бинои нави Муассисаи таҳсилоти миёнаи умумии рақами 15-и деҳаи Зеробод, ҳамзамон, бо мақсади ҷалби наврасону ҷавонон ба намудҳои гуногуни варзиш толори муосири варзишӣ бо беш аз 200 ҷойи нишаст барои тамошобинон сохта шудааст.

Дар толори варзишии мактаб барои баргузории бозиҳои волейбол, баскетбол, футболи хурд ва дигар намудҳои варзиш шароити хуб мавҷуд мебошад.

Хонандагону дигар бошандагони деҳаи Зеробод акнун имкон доранд, ки бо истифода аз шароити муҳайёгардида дар толори варзиши ин муассиса ба обу тоби бадан машғул шуда, дар тарғиби тарзи ҳаёти солим саҳм гузоранд.

Мактаб, ҳамзамон, дорои ошхона бо беш аз 140 ҷой буда, барои ҳунаромўзии духтарон имкон фароҳам оварда шудааст.

 Муассисаи таълимӣ бо нуқтаи алоҳидаи гармидиҳӣ таъмин буда, имкони пурраи ба таҳсил фаро гирифтани хонандагон дар синфхонаҳои гарм дар фасли зимистон мавҷуд мебошад.

Дар ин даргоҳи маърифат, ҳамзамон, синфхонаҳои таълими меҳнат барои духтарону писарон ба таври алоҳидагӣ таъсис дода шудааст.

Сарвари давлат, муҳтарам Эмомалӣ Раҳмон бо омўзгорону хонандагон суҳбати озоду самимӣ доир намуда, ба истифода додани муассисаи таълимии замонавиро туҳфаи арзишманди давлат ва Ҳукумати Ҷумҳурии Тоҷикистон ба истиқболи ҷашни бузурги миллӣ - 30-солагии Истиқлоли давлатӣ барои сокинони шарафманду меҳнатқарини деҳаи Зерободи ноҳияи Айнӣ арзёбӣ карданд.

Масоҳати иншоот наздики 1 гектарро дар бар гирифта, атрофи он дар доираи тадбирҳои ободониву созандагӣ дар масоҳати зиёда аз 3 ҳазору 700 метри мураббаъ кабудизор ва чароғон гардидааст.

Дар ноҳияи Айнӣ дар замони соҳибистиқлолии кишвар дар асоси дастуру ҳидоятҳои Сарвари давлат, муҳтарам Эмомалӣ Раҳмон 27 бинои нави таълимӣ бо муосиртарин шароити таълиму тарбия сохта ба истифода дода шуда, раванди донишомўзии хонандагон ба марҳилаи сифатан нав ворид гардидааст.

Дар маҷмўъ, дар ноҳияи Айнӣ 66 муассисаи таҳсилоти умумӣ фаъолият менамояд, ки 55 ададаш муассисаи таҳсилоти миёнаи умумӣ ва 11-тои дигар муассисаи таҳсилоти умумии асосӣ мебошад.

Дар таълимгоҳҳои ҳудуди ноҳия 18791 хонанда, аз ҷумла, 9379 духтар ба таълим фаро гирифта шудаанд, ки нисбат ба соли таҳсили  2019-2020   289  хонанда зиёд  мебошад.

Президенти Ҷумҳурии Тоҷикистон, муҳтарам Эмомалӣ Раҳмон ифтитоҳи бинои нави Муассисаи таҳсилоти миёнаи умумии рақами 15 дар деҳаи Зерободи ноҳияи Айниро ба ҳамаи омўзгорону хонандагон туҳфаи арзишманд дар соли ҷашни 30-юмин солгарди Истиқлоли давлатӣ арзёбӣ карда, масъулонро барои тарбияи хуби насли ояндасози миллат бо истифодаи пурра аз шароити арзанда дар рўҳияи хештаншиносию ватандўстӣ ва ифтихори миллӣ ҳидоят намуданд.