16 сентябр дар Қасри миллат ҷаласаи Шўрои амнияти дастҷамъии Созмони Аҳдномаи амнияти дастҷамъӣ ба кори худ оғоз кард.

Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон, Раиси Созмони Аҳдномаи амнияти дастҷамъӣ,  муҳтарам Эмомалӣ Раҳмон иштирокчиёни ҷаласа, сарони давлатҳои аъзои Созмони Аҳдномаи амнияти дастҷамъиро самимона истиқбол гирифтанд.

Дар кори ҷаласаи Шўрои амнияти дастҷамъии Созмон Президенти Ҷумҳурии Тоҷикистон, муҳтарам Эмомалӣ Раҳмон, Сарвазири Ҷумҳурии Арманистон Никол Пашинян, Президенти Ҷумҳурии Белорус Александр Лукашенко, Президенти Ҷумҳурии Қазоқистон Қосим-Жомарт Токаев, Президенти Ҷумҳурии Қирғизистон Садир Жапаров ва дабири кулли Созмони Аҳдномаи амнияти дастҷамъӣ Станислав Зас иштирок карданд.

Президенти Федератсияи Русия Владимир Путин дар кори ҷаласа ба таври маҷозӣ иштирок намуданд.

Баъди анҷоми маросими аксбардорӣ кори ҷаласаи Шўрои амнияти дастҷамъии Созмони Аҳдномаи амнияти дастҷамъӣ бо иштироки сарони давлатҳои аъзои Созмон дар ҳайати маҳдуд оғоз гардида, сипас бо иштироки аъзои ҳайатҳо дар шакли васеъ идома ёфт. Президенти Ҷумҳурии Тоҷикистон, Раиси Созмони Аҳдномаи амнияти дастҷамъӣ, муҳтарам Эмомалӣ Раҳмон ҳамаи иштирокчиён, сарони давлатҳои аъзои Созмони Аҳдномаи амнияти дастҷамъиро ба Тоҷикистон хайрамақдам гуфтанд.

Дар ҷаласаи хоссаи Шўрои амнияти дастҷамъии Созмони Аҳдномаи амнияти дастҷамъӣ (СААД) Президенти мамлакат, муҳтарам Эмомалӣ Раҳмон таваҷҷуҳи иштирокчиёнро ба масъалаҳои зерин ҷалб намуданд:

- Ҳамтоёни муҳтарам,

Ман бо арзёбиҳои зикршуда розӣ ҳастам, ки имрўз дар муносибатҳои байналмилалӣ равандҳои манфӣ дар соҳаи амнияти ҳарбӣ-сиёсӣ афзоиш меёбанд.

Инчунин, набояд фаромўш кард, ки мо то ҳол дар марҳилаи хатарноки пандемия қарор дорем.

Пандемияи аз ҷиҳати миқёс ва оқибатҳои худ бесобиқа ба буҳрони тўлонии иҷтимоию иқтисодӣ оварда расонд, ки бидуни муболиға, аз ҷумла, ба амнияти мо таъсир мерасонад.

Вазъи фалокатбор дар Афғонистон бевосита ба минта-қаи амнияти дастҷамъии Осиёи Марказӣ таъсир мерасонад.

Имрўз Афғонистон дар остонаи фалокати башарӣ қарор дорад.

Вазъияти мураккаб ва хатарноке, ки дар ин кишвар ба вуҷуд омадааст, на танҳо мушкили мардуми Афғонистон аст, балки ба яке аз мушкилоти шадидтарини минтақавӣ ва ҷаҳонӣ табдил меёбад.

Толибон аз ваъдаҳои қаблии худ дар бораи ташкили ҳукумати фарогир бо иштироки васеи дигар неруҳои сиёсӣ ва қавмҳои этникӣ дар ин кишвар даст кашиданд ва аз таъсиси як аморати исломӣ бар асоси қонунҳои сахти асримиёнагии шариат бо роҳбарии аъзои ҳаракати онҳо хабар доданд.

Ҳайати эълоншудаи ҳукумати муваққатӣ гуногунии сиёсӣ, қавмӣ ва забонӣ, инчунин, баробарии гендериро ба назар намегирад.

Ин маънои онро дорад, ки дар ду-се соли наздик ҷорӣ кардани идеологияи ифротӣ дар Афғонистон шадидтар мешавад ва эҳтимоли густариши ин ақидаҳои харобкорона дар минтақаҳои ҳамсоя афзоиш меёбад.

Тоҷикистон ҳама шаклҳои беқонунӣ ва таъқиби мардуми Афғонистонро шадидан маҳкум мекунад.

Аз холигии ҳарбию сиёсӣ истифода бурда, қувваҳои гуногуни террористӣ мавқеъҳои худро дар мамлакат фаъолона мустаҳкам мекунанд.

Дар пеши назари мо Афғонистон бори дигар ба макони терроризми байналмилалӣ мубаддал мешавад.

Мувофиқи маълумоте, ки ҳар рўз аз манотиқи мухталифи Афғонистон ба мо мерасанд, вазъи воқеӣ дар маҳал комилан дигар аст, он чанд маротиба бадтар аз онест, ки дар расонаҳо инъикос карда мешавад. Мо инро дар мисоли Панҷшер возеҳ дида метавонем.

Толибон дастрасии минтақаро ба ғизо ва дигар ашёи зарурӣ комилан манъ кардаанд. СММ, Салиби Сурхи Байналмилалӣ ва дигар созмонҳои башардўстонаи байналмилалӣ аз имконияти иҷрои рисолати худ маҳруманд.

 Тоҷикистон барқарорсозии сулҳу суботи пойдор дар Афғонистонро ҷонибдорӣ мекунад ва ба ин мавқеъ содиқ мемонад.

Мутмаинем, ки мушкили Афғонистон ҳалли низомӣ надорад ва барои ҳалли бетаъхири мушкилоти амнияти сиёсии кишвари ҳамсоя, бояд бо ҷалби табақаҳои васеи ҷомеа ва иштироки намояндагони ҳамаи миллатҳо ҳукумати фарогир таъсис дода шавад.

Низоми сиёсии ин кишвари ҳамсоя бояд бо назардошти ирода ва мавқеи ҳамаи шаҳрвандони кишвар, бидуни дахолати берунӣ муайян карда шавад.

Бетарафии ҷомеаи ҷаҳонӣ ба вазъи кунунии Афғонистон метавонад на танҳо ба ҷанги тўлонии шаҳрвандӣ дар ин кишвар, балки ба рўйдодҳои фоҷиабори аз ҷиҳати миқёс баробар бо ҳамлаҳои террористии соли 2001 оварда расонад.

Вазъияти имрўзае, ки дар Афғонистон ба назар мерасад, ба қитъаи тоҷикистонию афғонистонии ҳудудҳои ҷанубии СААД фишори шадид мерасонад.

Дар ин замина, зарурати идомаи кори муштараки пайваста оид ба ҳарчи зудтар ба итмом расонидани ҳамоҳангсозии Барномаи мақсадноки байнидавлатии СААД ҷиҳати таҳкими қитъаи сарҳади Тоҷикистону Афғонистонро зарур мешуморем.

Барои пешгирии шабакаҳои дастгирии молиявӣ ва моддию техникии гурўҳҳои террористӣ кўшиши фаъолонатар ба харҷ додан лозим аст.

Ба фаъолияти иттилоотии террористон, истифодаи онҳо аз технологияҳои навтарин, аз ҷумла, интернет диққати махсус бояд дод. Сарфи назар аз баъзе тамоюлҳои мусбат дар солҳои охир, таҳдиди маводи мухаддир низ ба амнияти минтақаи масъулияти СААД таъсири манфӣ мерасонад.

Умедворем, ки Стратегияи зидди маводи мухаддир, ки дар доираи СААД барои панҷ соли оянда (2021-2025) амалӣ мешавад, ба ҳалли ин масъалаҳо ва ҳамкории мо такони иловагӣ мебахшад”.

Дар кори ҷаласа масъалаҳои мубрами амнияти байналмилалию минтақавӣ, натиҷаҳои асосии фаъолияти Созмони Аҳдномаи амнияти дастҷамъӣ тайи давраи раёсати Тоҷикистон, Нақшаи чорабиниҳо оид ба иҷрои қарорҳои ҷаласаи Шўрои амнияти дастҷамъӣ ва татбиқи самтҳои афзалиятноки пешниҳоднамудаи Ҷумҳурии Тоҷикистон, инчунин, мавзуъҳои марбут ба вазъияти ниҳоят мураккаби Афғонистон мавриди баррасӣ қарор дода шуд.

Соли 2022 раёсат дар Созмони Аҳдномаи амнияти дастҷамъӣ ба ҷониби Арманистон мегузарад.

Дар кори ҷаласа “Дар бораи самтҳои афзалиятноки фаъолияти Ҷумҳурии Арманистон дар давраи раёсат дар Созмони Аҳдномаи амнияти дастҷамъӣ” Сарвазири Ҷумҳурии Арманистон Никол Пашинян ва “Дар бораи ҳуҷҷатҳое, ки барои баррасии Шўрои амнияти дастҷамъии Созмони Аҳдномаи амнияти дастҷамъӣ омода шудаанд”, Дабири кулли Созмони Аҳдномаи амнияти дастҷамъӣ Станислав Зас баромад карданд.

Баъди баррасии масъалаҳо аз руи натиҷаи кори ҷаласаи Шўрои амнияти дастҷамъии Созмони Аҳдномаи амнияти дастҷамъӣ, Эъломияи Шўрои амнияти дастҷамъии Созмони Аҳдномаи амнияти дастҷамъӣ ва дар маҷмуъ, 14 санад ба имзо расид.

Пас аз анҷоми маросими имзои санадҳо Дабири кулли Созмони Аҳдномаи амнияти дастҷамъӣ Станислав Зас барои доираи васеи хабарнигорони дохил ва хориҷи мамлакат нишасти матбуотӣ орост.

President.tj