1 октябр дар идомаи сафари корӣ дар ноҳияи Мир Сайид Алии Ҳамадонӣ Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон бинои Муассисаи таҳсилоти миёнаи умумии рақами 42-и ноҳияро мавриди истифода қарор доданд.

Мактаби нави деҳаи Навободи деҳоти Меҳнатободи ноҳия бо дастгирии Ҳукумати Ҷумҳурии Тоҷикистон аз тарафи Муассисаи давлатии «Маркази татбиқи лоиҳаи «Сохтмон ва муҷаҳҳазгардонии мактабҳо» бунёд гардидааст.

Иншооти мазкур аз 2 ошёна, 13 синфхона, 2 ҳуҷраи корӣ ва китобхона иборат буда, дар он 528 нафар хонанда дар ду баст ба таҳсил фаро гирифта мешаванд.

Президенти Ҷумҳурии Тоҷикистон, муҳтарам Эмомалӣ Раҳмон дар бинои нави муассисаи таҳсилоти миёнаи умумии рақами 42 аз шароити синфхонаҳои таҳсилоти ибтидоӣ, омўзиши технологияи компютерӣ, китобхона ва кабинетҳои фаннӣ дидан намуданд.

Синфхонаи омўзиши тех-нологияи компютерии ин муассисаи таълимӣ бо 24 адад компютери муосиру тахтаи электронӣ, кабинетҳои фанни химия, биология, физика ва китобхонаи мактаб пурра бо лавозимоти зарурӣ ва аёнияти хониш ҷиҳозонида шудаанд.

Сарвари давлат, муҳтарам Эмомалӣ Раҳмон ба сифати корҳои сохтмонӣ дар бинои нави муассисаи таълимӣ ва таъмини он бо шароити замонавии донишандўзӣ баҳои баланд дода, хонандагонро ба омўзиши ҳарчи бештари барномаи таълимӣ, аз ҷумла, фанҳои дақиқ, ширкат дар озмунҳои фаннӣ, мутолиаи китобу асарҳои бадеӣ иштирок дар озмунҳои ҷумҳуриявии “Фурўғи субҳи доноӣ китоб аст” ва “Илм — фурўғи маърифат” ҳидоят намуданд.

Дар муассисаи таҳсилоти миёнаи умумии рақами 42-и деҳаи Навободи деҳоти Меҳнатободи ноҳияи Мир Сайид Алии Ҳамадонӣ айни замон 485 хонанда ба таҳсил фаро гирифта шудаанд. Барои беҳтар намудани шароити таълиму тарбия дар асоси татбиқи сиёсати маорифпарваронаи Президенти мамлакат, дар баробари бунёди муассисаи нави таълимӣ бинои пештараи мактаби рақами 42, иборат аз 11 синфхона пурра аз таъмири асосӣ бароварда шудааст.

Президенти Ҷумҳурии Тоҷикистон, муҳтарам Эмомалӣ Раҳмон омўзгорон ва аҳли маорифи ноҳияро вазифадор намуданд, ки ба кори таълиму тарбия таваҷҷуҳи бештар зоҳир карда, хонандагонро дар рўҳияи ватандўстӣ ва ифтихори миллӣ ба камол расонанд.