Хоҳише дорам зи ту, Соли паланг,

Дар ҷавоби хоҳишам ҳаргиз маланг.

Ман чӣ хоҳам? Хоҳаме бо лутфи ту

Оварам моҳии тиллоро ба чанг.

Гўямаш: - Пуршўр дунё гаштааст,

Дигар акнун лаҳзае манмо даранг.

Аз дурўғу фитнаву макру ҳиял

Ҳолати аҳли башар гашта таҷанг.

Даррасида вақти ҳифзи ростӣ,

Вақти ҳифзи ҳастию номусу нанг.

Абри тира рўи дунё мекашанд

Бандагони кинаву тиру туфанг.

Тайр аз тайёраҳо камтар шуда,

Осмони сулҳ гашта тираранг.

Боядо аз бех кардан торумор

Олами сармояву афюну банг.

Боядо саркўб кардан  Аҳриман,

Баски дорад боз ҳам оҳанги ҷанг.

…Моҳии тилло, ҳамехоҳам зи ту:

Бо шарофатбории Соли паланг

Ҷангҷўёни ҷаҳонро кўр кун,

Олами мо баҳрашон  бинмой танг.

(Ҳикмати деринаву барҳақ бувад:

Каллаи бенанг меояд ба санг).

То ки ин дунё шавад дар Соли нав

Тозаву дилҷўву зебою қашанг.

…Ассалом, эй моҳии тиллои мо!

Ассалом, соли наку – Соли паланг!

Абдурауф МУРОДӢ