6 - 11 декабри соли ҷорӣ дар шаҳри Бокуи Ҷумҳурии Озарбойҷон Олимпиадаи байналмилалии “Озмоишгоҳи таълимии истеъдодҳо-2021” аз фанҳои математика, физика ва химия байни хонандагони синфҳои 9-10 баргузор гардид, ки Ҷумҳурии Тоҷикистонро 3 нафар хонандаи муассисаҳои таълимии кишвар муаррифӣ намуданд. Дар Олимпиадаи байналмилалии “Озмоишгоҳи таълимии истеъдодҳо-2021” хонандагон аз давлатҳои ИДМ ва Балтика иштирок намуданд. Шукрона Охунова, хонандаи синфи 9-и муассисаи давлатии таълимӣ барои хонандагони болаёқати шаҳри Хуҷанд сазовори ҷойи сеюм гардида, бо медали биринҷӣ сарфароз гардонида шуд.

Инчунин, рӯзҳои 11-12 декабр дар шаҳри Алмаатои Ҷумҳурии Қазоқистон Олимпиадаи даставии барномасозии АвруОсиёӣ байни хонандагони синфҳои 10-11 баргузор гардид, ки аз Ҷумҳурии Тоҷикистон 2 дастаи иборат аз 6 хонанда ва 1 роҳбари даста иштирок намуда, сазовори 6 ҷойи ифтихорӣ (3 медали биринҷӣ ва 3 медали нуқра) гардиданд. Аз ҷумла, Дилшод Имомов, хонандаи синфи 11- и Муассисаи давлатии таълимии “Литсей барои хонандагони болаёқат” дар шаҳри Душанбе (медали биринҷӣ), Бинёмин Афроимов, хонандаи синфи 11-и “Литсей барои хонандагони болаёқат” дар шаҳри Душанбе (медали биринҷӣ), Бежан Гулов хонандаи синфи 11-и Литсей барои хонандагони болаёқат дар шаҳри Душанбе (медали биринҷӣ), Шаҳром Аминов, хонандаи синфи 11- и филиали Литсей-интернати тоҷикӣ-русии Ҳотам ва ПВ дар шаҳри Ҳисор (медали нуқра), Ворис Раҳимов, хонандаи синфи 11-и филиали Литсей-интернати тоҷикӣ-русии Ҳотам ПВ дар шаҳри Ҳисор (медали нуқра), Бобохон Маҳмудов, хонандаи синфи 10-и филиали Литсей-интернати тоҷики-русии Ҳотам ПВ дар шаҳри Ҳисор  сазовори медали нуқра шуданд.     

Ҳамзамон, рӯзҳои 12-21 декабри соли ҷорӣ дар шаҳри Дубайи Аморати Муттаҳидаи Араб 18-умин Олимпиадаи байналмилалии илмӣ барои наврасон аз фанҳои физика, химия ва биология “IJSO 2021” тариқи фосилавӣ байни хонандагони синфҳои 5-9 баргузор гардид, ки Ҷумҳурии Тоҷикистонро 6 нафар хонанда муаррифӣ намуданд. Дар Олимпиадаи мазкур хонандагони 74 давлат иштирок намуданд. Аз Ҷумҳурии Тоҷикистон Ҳусейн Ғуломзода, хонандаи синфи 9-и “Литсей барои хонандагони болаёқат” дар шаҳри Душанбе  аз байни 400 нафар иштирокчӣ ҷойи сеюмро ба даст оварда, бо медали биринҷӣ сарфароз гардонида шуд.

Зайнаб Ҳусейнова,

корманди маркази матбуоти

Вазорати маориф ва илм