Бахшида ба Рӯзи Президенти Ҷумҳурии Тоҷикистон дар мактаби № 35-и шаҳри Душанбе бо собиқадорони ин таълимгоҳ Муҳаббат Фозилова ва Ҳафизамоҳ Шамсиддинова вохӯрӣ баргузор шуд.

Дар вохӯрӣ собиқадорони мазкур бо хонандагон оид ба фаъолияти нимасраи худ суҳбати гарму самимӣ ва пурҳикмат оростанд. Корманди шоистаи Ҷумҳурии Тоҷикистон, Аълочии маорифи Ҷумҳурии Тоҷикистон Муҳаббат Фозилова ва Аълочии маорифи Ҷумҳурии Тоҷикистон Ҳафизамоҳ Шамсиддинова зиёда аз ним аср дар таълиму тарбияи насли наврас заҳмати пурсамар кашидаанд. Ин собиқадорони маориф аз солҳои мактабхонӣ орзу доштанд, ки омӯзгор шаванд ва ба насли наврас таълиму тарбия диҳанд.

Пас аз хатми мактаби олӣ аз соли 1963 онҳо ба мактаби миёнаи рақами №35 ба кор омаданд. Дере нагузашта, дар натиҷаи фаъолияти фарогири ин устодони эҷодкору заҳматкаш таълимгоҳи мазкур дар пойтахт овозадор гашт. Бо гузашти солҳо комиссияи аттестатсионии шуъбаи маориф ба фаъолияти педагогии Муҳаббат Фозилова ва Ҳафизамоҳ Шамсиддинова баҳои баланд дода, таҷрибаи омӯзгории онҳоро дар мактабҳои пойтахт паҳн намуд. Ҳамасола наздики 70%-и шогирдони ин устодони пуртаҷриба ба мактабҳои олӣ дохил мешуданд. Дар олимпиадаҳои фаннӣ дар пойтахт ва дар сатҳи ҷумҳурӣ шогирдони ин шахсони пуртаҷриба ҷойҳои намоёнро ишғол менамуданд.

Дар баробари ин серкорию навоварӣ аз соли 1975 Муҳаббат Фозилова иҷрои вазифаи ҷонишини директори ин таълимгоҳро ба уҳда дошту муаллима Шамсиддинова роҳбари иттиҳодияи методии омӯзгорони математика буд. Муҳаббат Фозилова ба ҳайси ҷонишини директор барои баланд бардоштани сифати таълим корҳои шоистаеро иҷро намуд. Махсусан, дар ташкил намудани синфҳои равиявӣ ҳиссаи ӯ калон буд. Муҳаббат Фозилова соли 1973 бо медали «Ғолиби мусобиқаи сотсиалистӣ» ва соли 1983 бо нишони «Аълочии  маорифи Ҷумҳурии Тоҷикистон» мукофотонида шудааст. Соли  1989 ба дарёфти унвони «Корманди шоистаи Ҷумҳурии Тоҷикистон» ноил гардидааст. Аз ҳама мукофоти баланд барои ин ду бонуи саодатманд меҳру муҳаббату эҳтироми  шогирдон ва омӯзгорони таълимгоҳ мебошад.

Омӯзгорони арҷманд Муҳаббат Фозилова ва Ҳафизамоҳ Шамсиддинова имсол ба синни  мубораки 80 расиданд.  Ба ин муносибат омӯзгорону хонандагони мактаби №35 (директораш З.Абдуллоев)  ин ду омӯзгори  асилу сарбаландро самимона таҳнияту шодбош мегӯянд.

Зебинисо СОЛИБОЕВА,

роҳбари иттиҳодияи

методии омӯзгорони математикаи мактаби №35,

Аълочии маориф ва илми Ҷумҳурии Тоҷикистон