Дар ноҳияи Восеъ бахшида ба Соли рушди сайёҳӣ ва ҳунарҳои мардумӣ бо ташаббус ва дастгирии Корхонаи воҳиди давлатии ҷумҳуриявии «Тоҷикагролизинг» озмуни минтақавии «Ихтироъкор ва навовари беҳтарин»   миёни хонандагони муассисаҳои таҳсилоти ибтидоии касбӣ ва муассисаҳои таҳсилоти миёнаи умумии шаҳру ноҳияҳои минтақаи Кӯлоби вилояти Хатлон  баргузор гардид. Ҳадаф аз гузаронидани озмун дар амал тадбиқ намудани сиёсати давлатӣ дар соҳаи илму технология,  имконият фароҳам овардан ва ҷалбу ҳавасмандгардонии хонандагону донишҷӯён ва навоварон ба корҳои илмию  инноватсионӣ, баланд бардоштани мақоми онҳо дар ҷомеа ва фаъол гардонидани маҳфилҳои техникӣ мебошад.

Раиси ноҳияи Восеъ Мусо Ғаффорзода дар ифтитоҳи озмун ба довталабон муваффақиятҳо орзу намуд. Сипас, сардори КВДҶ «Тоҷикагролизинг»  Юсуф Акрамзода довталабонро ба ҳайати тадорукот, доварон ва талаботу шартҳои озмун шинос кард. Ҳайати доварон озмунро ҷамъбаст намуда, беҳтаринҳоро муайян карданд. Ҷойи аввал  ба хонандаи мактаби Президентии ноҳияи Данғара Муҳаммад Саидов барои навоварӣ бо пешниҳоди лоиҳаи «Хонаи амниятӣ»   (мукофотпулӣ 3000 сомонӣ), ҷойи дуюм ба намояндаи маркази техникии назди литсейи касбӣ-техникии №16-и ноҳияи Восеъ Сафар Одинаев барои ихтироъкорӣ бо пешниҳоди лоиҳаи «Генератори барқии каммасраф» (мукофотпулӣ 2500 сомонӣ) ва ҷойи сеюм ба  Хуршед Амиров навовар аз ноҳияи Темурмалик бо пешниҳоди лоиҳаи «Дастгоҳи элеватории тухмитозакунак»  (мукофотпулӣ 2000 сомонӣ) насиб гардид. Ҳамчунин, аз тарафи ҳайати тадорукоти озмун 21 нафар  ихтироъкору навовар барои  иштироки фаъол дар озмун бо Ифтихорнома ва мукофоти пулии  КВДҶ «Тоҷикагролизинг» қадрдонӣ шуданд.

Шариф АБДУЛҲАМИД,

 «Омӯзгор»