Дар толори фарҳанги филиали Донишгоҳи давлатии Москва ба номи М. В. Ломоносов дар шаҳри Душанбе бахшида ба рӯзи ташкили донишгоҳи мазкур ва Рӯзи донишҷӯёни Россия чорабинии идона баргузор гардид.

Муовини директори иҷроияи филиали донишгоҳ Маҳмадсалим Абдукаримов зимни  ифтитоҳи ҳамоиш қайд кард,  ки Донишгоҳи давлатии Россия ба номи М. В. Ломоносов ҳанӯз 264 сол пеш  (соли 1755) ташкил гардида, филиалҳои он дар қисми зиёди давлатҳои собиқ ИДМ кушода шудааст. Аз ҷумла, соли 2009  дар ҷумҳурии мо ҳам филиали он ифтитоҳ ёфт ва тирамоҳи ҳамин сол даҳсолагии он қайд хоҳад гардид.  Сафири фавқулодда ва мухтори Федератсияи Россия дар Ҷумҳурии Тоҷикистон Лякин – Фролов Игор Семёнович аз саҳми устодони ин даргоҳ дар тарбияи шогирдон сухан гуфт. Қайд гардид, ки хатмкардагони  Донишгоҳи давлатии Москва ба номи М. В. Ломоносов дар тамоми соҳаҳои хоҷагии халқ фаъолият намуда, саҳми худро дар пешрафти ҷомеа мегузоранд. Аз ҷумла, аз байни 18 нафар дорандагони Ҷоизаи Нобелии рус 11 нафари онҳо ҳамин донишгоҳро хатм кардаанд.

Намояндаи Маркази фарҳангии «Россодрудничество» дар шаҳри Душанбе  Михаил Вождаев  кулли устодон ва шогирдони донишгоҳро бо Рӯзи донишҷӯёни Россия таб-рик гуфта, қайд кард, ки ҳамкории минбаъдаи  марказ бо филиали Донишгоҳи давлатии Москва ба номи М. В. Ломоносов боз ҳам густариш хоҳад ёфт.

Ба як қатор донишҷӯёни фаъоли донишгоҳ  барои ахлоқи хуб  ва дониши намунавиашон ифтихорномаҳои филиали донишгоҳ супорида  шуд.  Дар қисми фарҳангии чорабинӣ намояндагони ансамблҳои як қатор муассисаҳои таҳсилоти олии касбии ҷумҳурӣ ва гурӯҳи ҳунарии худи донишгоҳ барномаи мукаммали иборат аз рақсу сурудро  пешкаши иштирокдорон гардонданд.

Ҳотами Ҳомид,

«Омӯзгор»